حسين فتحى يكتب: مجلس ” مرزوق ” بيفكرتى ب ” أمناء المخازن” بتوع السبعينات اللى كانوا بيولعوها قبل الجرد”

لما يبقى مدرب بيشتغل تحت ضغط من أول الموسم وكل مباراة يتهدد بإنه هيمشى ويجيبوا مدرب غيره ويسربوا له أسماء مدربين عشان يعرف إنهم بيتكلموا بجد ويعلقوا إقالته على نتيجة مباراة يقوم ربنا ينصفه ويكسف أصحاب المبادرة ويفوز ويدوب يستريح يوم واحد ويرجعوا تانى يهددوه بالإقالة .. ١٥ مباراة على هذا الحال لو أى حد منصف من بتوع الكورة كان مكانه كان هيعمل إيه ويتصرف إزاى ؟ ويدوب ما صدقوا أول مباراة يخسرها فى ١٦ مباراة وبيحتل المركز الثانى بفارق ٣ نقاط بينه وبين الأول وباقى ٤ مباريات لكل فريق وفرصة الشرقية فى الصعود كأول أو ثانى مازالت قائمة وموجودة لو فاز فى المباريات الباقية خاصة وإن المنافس اللى هو المريخ عنده مواجهتين صعبين جداً زى الشرقية لأنه هيلاعب بلدياته بورفؤاد بكرة الثلاثاء والشرقية هتلاعب بورفؤاد الثلاثاء اللى بعده وأخر أسبوع فى المسابقة الشرقية هيلاعب المريخ فى بورسعيد والشرقية فازت فى الدور الأول بهدف نظيف فى وجود المدرب وكانت هتحاول تحقيق نتيجة إيجابية فى مباراة بورسعيد برضه بالمدرب ده !! ولكن الجهابذة والخبراء اللى بيديروا شايفين غير ما الناس كلها شايفة وكأنهم من كوكب تانى أو كأن الناس بتاعت الكورة مبتفهمش وهما بس اللى بيفهموا .. واللى يجننك إنهم راحوا ل … رأس القرد وشموها يعنى ياريتهم جابوا حد بيشتغل فى نفس الدرجة ونفس المجموعة لأن مبعوث العناية الٱلهية محتاج ١٠ مباريات على الأقل لحد ما يحفظ أسماء اللعيبة ويعرف مراكزهم وفى أول وقعة هيقولك القماشة وسوء الإختيار ومين اللى جاب اللعيبة دى … إلى أخره من الإعذار !! بصراحة مجلس الإدارة بيفكرونى بأمناء المخازن بتوع السبيعنات اللى كانوا بيولعوا فى المخازن قبل الجرد عشان يوهموا الناس إن النار حرقت البضايع والظاهر كده إنهم عاوزين يداروا على شمعتهم عشان أعضاء الجمعية العمومية وأنا منهم لما يسألوهم على المبالغ اللى اتصرفت على الفريق واللعيبة اللى جت أول الموسم ومشيت فى نص الموسم والمصابين والمتصابين والنص لبة …… مين هيحاسب على الفلوس اللى اتصرفت ومتفتكروش إن الراجل اللى ضحيتوا بيه ودبحتوه بسكينة تلمة وبتغسلوا ايديكم من دمه ولا المحلل اللى جايبينه تجملوا صورتكم بيه هما اللى هيتحاسبوا على إهدار المال العام ويا ويلكم يا سواد ليلكم الفترة الجاية وهتتحاسبوا حساب عسير بإذن الله وذنب ناس كتير ظلمتوها ومنهم الراجل اللى مشتوه من غير ذنب وبدون سبب مقنع وأكيد ربنا سبحانه وتعالى هيقتص منكم عندما يجتمع عنده الخصوم وحسبى الله ونعم الوكيل !!!