الرئيسية / أخبار الفن / أول فنجان قهوة مع الكاتب هشام زكريا : الجمهور عايز كده عبارة تجارية هدفها الربح على حساب المنتج!!

أول فنجان قهوة مع الكاتب هشام زكريا : الجمهور عايز كده عبارة تجارية هدفها الربح على حساب المنتج!!

عبارة ” الجمهور عايز كده ” ، عباره تجاريه ، تهدف إلى الربح على حساب أي حاجه ، البحث عن الشرائح التي تشتري بضاعتك مهما كانت رداءه هذه البضاعة لأن الجمهور مقبل عليها ، وبالتالي ما يحكمني هنا إرادة العامه ، حتى لو كانت تدني في المستوى وانحدار في القيم ـ المهم تقص الشريط وتدخل برجلك اليمين .

هنا مفيش أي معاناة أنك تحول الجمهور وتتعب معاه في تنظيم اختياره وعقله والرفع من وعيه ، لأن ده في النهاية هينعكس على المناخ العام ، والذوق العام وعلى حتى قيم الحق والخير والجمال.

انتشرت عندنا في الثمانينات ما أطلق عليه أفلام المقاولات ، وكنا بننتج كل يوم فيلم ، لدرجة أنك ممكن تشوف 365 فيلم في السنه ، الحصيلة تدني في الأذواق وانتشار مناخ جديد وثقافة جديدة انعكست على كل شئ ، أكلك وشربك وتعليمك ووعيك وصحتك ، حتى انتشار المخدرات أثرت فيه .

مسرحيه مدرسة المشاغبين ، اللي اعتبرت ايقونه من أيقونات الكوميديا والمسرح ، تسببت في بدايه انهيار التعليم وفقد العلاقة بين الطالب والمدرس ، عملت بعدها أجيال عاشت تحت مظله ” العلم لا يكيل إلا بالباذنجان ” !!

أذن أنت من تفرض على الناس نوعيه الاستهلاك ، وأنت من تطاوع انهيار وعيهم بالمزيد من الدخول في مناطقهم المهيأة لمزيد من الوقوع والامتصاص لكل ما هو يغيب وعيهم وعقولهم .

اليوم متعة المشاهدة وإدمانها ، حولت واحد قاعد بشبشب وبنطلون مقطوع وجايب سجاير فرط ، إلى محلل ، ويقولك هو ليه متجبوش اللاعب ده ، ايه يعني 100 مليون والمصيبه هو مفيش في جيبه أصلا 10 جنيه .

كل ده هو نتاج عبارة الجمهور عايز كده ، على فكره هي مش عبارة تخص السينما والمسرح والدراما والتلفزيون وأفلام المقاولات ، هي عباره تعبث بكل شئ ، تعليم وصحه ووعي وثقافة واستهلاك ، النهارده الصين بتبيع لك بضاعه بـ خمسه جنيه علشان الجمهور عايز كده ، بتبيع الكم على حساب الكيف ، اللي ممكن يخرب بعد ساعات ، لكنك مبسوط ومنشكح من نفسك أنك قدرت وفقا لظروفك تشتري أي بضاعه ، حتى لو أي كلام .

 

عندم نكتفي بهذا القدر ، حاجات كتير هتتغير ، عندما نخاطب وعي المواطن وليس استهلاكه ، هيكون عندنا عقول قادره على تمييز المنتج الجيد من المنتج الردئ ، في كل شئ

Powered by themekiller.com anime4online.com animextoon.com apk4phone.com