عاشق الدراويش يكتب : كلمة حق وتلك رسالتى للمجلس الحالى : “ابراهيم عثمان” لم يكن فيه ربع “مساويء الكومى”

أقسم بالله العظيم كل كلمة بقولها هي طالعة من قلبي و مبعرفش اجامل و كل كلمة بقولها بما يرضي الله
اولا آبراهيم عثمان له ما له و عليه ما عليه و كان عنده أخطاء كارثية و عمل مشاكل كتير مع النادي و جماهيره و لكن
١- ابراهيم عثمان مكانش بيدي اللاعيبة شيكات بدون رصيد تخلي المدربين و اللاعيبة يبطلوا يتعاملوا مع النادي زي الاستاذ يحيى الكومي
٢- ابراهيم عثمان مكانش بيلف على قنوات التليفزيون عشان يطلع ياخد اللقطة و ينسب النجاح لنفسه زي ما يحيى الكومي بيعمل دلوقتي
٣-ابراهيم عثمان لما كان بيجيب لعيبة مستواها سيء مكنش بيطلع على الهواء يقول انا جبت لعيبة كسر عشان يبرر الغلط لنفسه و يبرأ نفسه زي ما الأخ يحيى الكومي عمل
٤- ابراهيم عثمان لما كان بياخد قرار بإقالة مدرب مكنش بيرجع في قراره بعديها بساعة زي ما الكومي عملها دلوقتي
٥- ابراهيم عثمان و اخوه اسماعيل عثمان لما حبوا يصلحوا حتى لو عشان مصلحتهم جابوا إيهاب جلال و علي ابوجريشة و جابوا لعيبة كويسة في يناير ظبطت مستوى الفريق في الدور التاني
انا مش بدافع عن ابراهيم عثمان خالص و لكن شوف الجمهور كان مغلول منه اد ايه بالرغم إنه مكانش فيه ربع مساويء المجلس الحالي و رغم ذلك الناس بتطالبنا بدعم النادي فإذا كان ابراهيم عثمان السيء صاحب الأخطاء الكتير مشي فجيه الأسوء منه
أنا بتحمل كل كلمة بقولها كويس جدا و لو لا قدر الله حصل هبوط للممتاز ب يبقى المجلس الحالي يتحمل الهبوط بنسبة ١٠٠ في الميه
و يتعمل فيا محضر يتقال عليا قبيض يتقال زي ما انتوا عايزين بس انا كل كلمة بقولها هي الحقيقة و ربنا عالم انا بحب النادي أد ايه و مليش اي مصلحة في الكلام اللي بقوله غير أني بحب النادي و خايف على الدراويش
اللهم بلغت اللهم فاشهد