سيد سلام يكتب : المعركه المشتعله حول مستشفى فاقوس العام ليست فى صالح الجميع والكل حيطلع منها خسران

الجميع يعرف ان المستشفى متهالك من زمان ومحتاج حاجات كتير جدا من زمان وكنت ارى انه قبل تحويل مستشفى فاقوس لمستشفى عزل ان يتم توفير كل الاحتياجات التى يحتاجها المريض والتى يحتاجها الاطباء والتمريض والعمال وكان يجب عمل تدريب سريع جدا للاطقم الطبيه لكيفية التعامل مع المرضى لانقاذهم ولحماية انفسهم من نقل العدوى لهم ….الاطباء زعلانين ودا حقهم  ولكن وجودهم واستمرارهم فى المعركه لمواجهة هذا الوباء اللعين واجبهم… ومن حقهم الغضب لموت طبيب شاب بسبب تقصير حصل معاه ويجب على الدوله محاسبة ومعاقبة المقصر مهما كان موقعه
ما حدث مع رجاء الجداوى من اهتمام دا الطبيعى اللى مفروض يحصل مع الجميع واللى المفروض الدوله تعمله انما ما حدث مع الطبيب من اهمال هو الاستثناء وما كان يجب ان يحدث بصرف النظر عن اذا كانت دى فنانه ودا طبيب …
والموضوع مش محتاج تهوين ولا تهويل ..احنا فى كارثه ويجب ان نتكاتف جميعا لمواجهتها انقاذا لانفسنا ولبلدنا ويجب على الجميع ان يعمل كل فى موقعه باخلاص وتفانى..الدوله مقصره ٱه ودا مش عيب الاعتراف به فدول عظمى وكبيره عجزت فى صد هجوم هذا الوباء  والشعب مقصر باهماله وعدم وعيه وادراكه لحجم الكارثه. الاطباء من حقهم ان يخافوا على انفسهم وعلى اسرهم وبجب توفير كل انواع الحمايه لهم …والجماعه كارهى البلد اللى ببستغلوا الظروف والازمات لاشعال
الفتنه فى البلد كرها فى استقرارها انتم غير مرغوب فيكم ومنبوذين ومعروف نواياكم القذره ولن تنجح خططكم…والجماعه المطبلاتيه على الفاضى والمليان لمكاسب شخصيه خاصه بهم وطالعين يهددوا الاطباء ويتهموهم بالخيانه عايز اقولك يامطبلاتى انت وهو انت لو مكان الطبيب وفى قلب المعركه حتبقى خايف على نفسك وعلىعائلتك زيهم بالظبط فبلاش ادعاء الوطنيه واستغلال الازمات لعمل مكاسب خاصه انتم زى اعداء البلد بالظبط مكروهين ومنبوذين ….اللى بيدافع واللى خايف على البلد بجد دا شئ حلو جدا ومطلوب واللى زعلان على تقصير بيحصل فى البلد وبيتكلم عنه بلاش نتهمه انه اخوان ونتهمه بالخيانه الوطنيه استقيموا يرحمكم الله …اما الجدل اللى شغال على مواقع التواصل الاجتماعى حول احتياجات مستشفى فاقوس عايز اقولكم المستشفى محتاج حاجات كتير جدا وعلى الجميع مساعدة الدوله على سرعة امداد المستشفى بما يحتاجه وهذا لا يعيب الدوله فى شئ …اللى يقدر يساعد المستشفى باى حاجه لا يتردد ويقدمها فورا مساعده ماديه اوعينيه والمستشفى مكانه معروف للجميع لانقاذ ما يمكن انقاذه …الاطباء انتم فرسان المعركه مهما طالتكم اسهم التقصير استمروا فى المعركه اعانكم الله وسدد على درب الشفاء خطاكم.. اللهم احمى مصر وبارك فيها وانقذها يا الله من مطبلاتى جاهل.او من معارض حاقد كاره
ستظل مصر صامده قويه بابنائها الاوفياء من اطباء مخلصين ورجال جيش وشرطه مدافعين بكل ابنائها المحبين رغم كيد الكائدين وحقد الحاقدين