ايمن دياب يكتب : تلك رسالتى لجمهور الدراويش ” انتم ستكونون من أسباب خراب النادي مثل ” أعضاء الجمعية العمومية ” اللي انتخبوا ” الكومي ” وكل التحية لابناء النادي الذين تحملوا سخافات وهيافات الجهله

الموضوع ابسط بكتير من كل التحليلات اللي الجماهير بتقولها وتكتبها تهاجم فيها حمزة الجمل وتقلل من قدره .. ببساطة كده اهو حمزة مشي لما نشوف أهميتكم وقيمتكم عند رئيس النادي المبجل اللي هايعملكم خاطر ويجيب مدرب عالمي على حسابه يكسب بيه دوري وكاس!!
للأسف الجماهير بصفة عامة بيجيلها وقت بتكون ناكرة للجميل وده بعد ما تطمن لوضع فريقها سواء في المنافسة على البطولة او الهروب من الهبوط .. وأيوه الإسماعيلي كان هاينزل للدرجة التانية وكل المدربين اللي حاولوا يعملوا حاجة لانقاذ الفريق فشلوا سواء الاجانب او المصريين والوحيد اللي نجح في جمع نقاط والهروب من عار الهبوط هو حمزة الجمل.
وايوه حمزة من حقه يمدح نفسه بعد ما اتعرض للاهانة مرتين الاولى بتسريب خبر اقالته والتانية باقالته فعلا بطريقة مهينة.. من حق حمزة الجمل إنه يفتخر بفترة عمله وأيوه هو رفع راس كل اسمعلاوي بالنقاط اللي جمعها الفريق في وجوده بعد ما كان ملطشه وبعد ما كانت جماهيره وشها في الأرض من ذل الهزيمة وشبح الهبوط.. صحيح الجماهير كانت وراء الفريق من اول الدوري لكن الصحيح برضو إن الوحيد اللي ربنا وفقه هو حمزة .. ليه بنستكتر عليه حقه في حفظ كرامته وتوضيح جهده وتعبه مع الفريق الفاشل اللي كان فاضحنا طول الموسم؟؟ لحقنا ننسى خيبة الأمل اللي كنا عايشين فيها طول الموسم!!
ناكرين للجميل ونعيش في سطحية تامة ونكتب يوميا بماء النار شتائم وسباب لأناس لا يستحقوا منا سوى الشكر العرفان.
يا جمهور ناكر للجميل مفيش حد هايحترمك ولا يعملك حساب بعد اللي بتعمله ده في نجومك وولاد ناديك وياريت لما تعملوا سبعين راجل في بعض تبقوا كمان تجمعوا مرتب جوارديولا علشان ييجي يحقق طموحاتكم اللي عجز عنها حمزة الجمل ولا هاتقضوها هيافة وشتايم وده اخركم!!! انتم ستكونون من أسباب خراب النادي مثل أعضاء الجمعية العمومية اللي انتخبوا الكومي ولا حول ولا قوة إلا بالله العلي العظيم.
كل التحية لابناء النادي الذين تحملوا سخافات وهيافات الكثيرين من الجهله وعديمي الأدب والتربية.