عبدالناصر زيدان يكتب : الرجاله إشتغلت بدري والدولة أكبر من أن تحارب شخص مهما كان

🔴 الرجاله اللي نزلت الملعب بدري وشغاله عايزه تعمل معركه بين الدولة والكابتن محمود الخطيب .. إهدوا شويه .. لأن ما تريده الدوله سيكون .. مهما حصل ومهما كان .

🔵 .. وكلمه هقولها للممولين .. وبتوع التعليمات .. والتسريبات .. والإسكربتاتت .. والتصميمات .. والشائعات .. والفبركه والسبح .. والمنح .. والمكافآت .. وكل الحاجات .. أنتم تحاربون الخطيب .. ولا تحاربون له .. وحربكم موجه ضده .. وليست لبقاءه أو الدفاع عنه .. لأن مفيش حد أكبر من البلد دي ولا أكبر من مؤساستها .. والخطيب نفسه بريء من أفعالكم .. وفي كل مكان لو سألوه سيتبرأ منكم .. ولا ينفع يتقال عنكم محبين .

🟢.. والناس اللي بتقول الدولة فَصَلت بند ال8 سنوات قبل كده عشان تُقصي الكابتن حسن حمدي ومن معه .. فلازم تكملوا الشهاده مجرده لله يا كذابين .. لأن بند ال8 سنوات في هذا التوقيت لم يكن ضد الأهلي ولا حسن حمدي .. بل كان ضد توريث الإتحادات الرياضيه والأندية .. وضد اللي تعفنوا علي الكراسي .. وإمتلكوا مقدرات الجمعيات العموميه .. وباتت هذه الجمعيات ملكية أبوهم .

🟠.. في عندنا 90% من الأندية جمعياتها العمومية بلا حول ولا قوة .. وفشلت حتي في الإستفاده من قانون الرياضه منذ صدوره .. وتخلت عن حقوقها الرقابيه لصالح من يدير .. وأغلب أنديتنا بلا جمعيات عموميه قادره علي مناقشة أي ميزانية أو خطط لمجالس إدارتها .. وكل موعد لأي جمعيه عموميه لإتحاد أونادي .. تتحول لحرب بين قله معارضه تبحث في المخالفات .. وأغلبيه متحكمه تصرف الآلاف والملايين حتي لا يكتمل النِصاب القانوني .. وبالتبعية تفوض المجالس ” بسكٍ ” ملاكي عن طريق المؤيدين في كل جدول الأعمال .. مع بند ما يستجد بصلاحيات مطلقه حتي لو المجلس عايز يبيع النادي .. وكله بيعمل اللي عايزه .. والدوله مغلولة اليد بلا حول ولا قوة بعد أن تنازلت عن قوتها وصلاحيتها لجمعيات عموميه لا نشهدها إلا محمولةً في الأتوبيسات مع وجبه وفلوس للمشرف وبتوع الدعاية عندما يكون هناك إنتخابات .

🟣 .. والأهلي أكتر نادي إستفاد من بند ال8 سنوات .. لأن محمود طاهر تولي رئاسة القلعة الحمراء عن طريق هذا التعديل .. وأنقذ الأهلي من كوارث ومن الإفلاس في هذه الفتره .. وكمل نجاحات ما قبله وزاد عليها إنجازات يُحكي عنها حكايات حتي الآن .. ومازال الأهلي ينعم بما حققه محمود طاهر ومجلسه في سنواته الأربع حتي الآن .. وروحوا إسألوا الأعضاء في كل أفرع الأهلي .. وهذا يدل علي أن الأندية لا تتأثر برحيل شخص مهما كان نجاحه .

⚫️ .. فبلاش نضحك علي الناس .. عيب .. والخطيب مش في حرب مع أي مسؤل .. وفي أكثر من رئيس نادي ناجح غيره .. وربما أكثر منه مقارنةً بإمكانيات الأهلي وجماهيريته ومداخيله المالية .
وناس كتير ضد إقصاء أي ناجح من المشهد .. وهؤلاء يتعدوا علي الأصابع .. والوضع في الأغلبيه مش الأحسن .. والإصلاح يحتاج لدم جديد .. ووجوه غير “متهالكه” أو “مدمره” .

⚪️ . وأنا شخصياً مع وجود الخطيب في الأهلي .. ومحمد مصيلحي في الإتحاد السكندري .. وأسامه أبوزيد في نادي الشمس .. ومصطفي الشامي في البلدية .. وطارق سعيد في الترسانه .. ومع كل رئيس حقق طفره يشهد لها القاصي والداني .. مهما كان مين وفين .. وكذلك الأمر في الإتحادات الرياضية .. واللجنة الأولمبية .. ومراكز الشباب .

⚫️ .. والخطيب ليس الناجح الوحيد .. وشغل “نسج ” المؤامرات من وحي خيال أصحابه يضر صاحبه قبل غيره .. لأن الدولة لا تحارب أحد .. والدولة أكبر من أن تفصل قانون ضد أي شخص بعينه .

🔴 .. الدولة المصرية قوية في كل المجالات وفي قمة قوتها مع هذا الرئيس القوي الأمين .. وتستطيع أن تفعل أي شيء وكل شيء .. مادام في صالح الرياضة المصرية وبما يخدم مصالح وسعادة شعبها العظيم .. واللي بناها في 10 سنوات .. محدش يقدر “يقف” قدام جمهوريته الجديده .. لا أفراد .. ولا جماعات .. ولا صفحات .. لأن كل من بحارب الإصلاح ناس ورقيه .. أو فيسبوكيه .. وأغلبهم في “البخ ” بيطير ذي العصافير . وكفاية أوهام فارغه .. وشغل المصالح .. شغل غير قانوني .. ومبني علي منافع حرمها شغل العمل العام .. ويحاربها بكل حزم هذا النظام .

🟠 وكل بند هيتغير في قانون الرياضة خضع لدراسات ناتجه عن رؤيا .. وآليات قادرة علي التنفيذ بكل الإمكانيات .. واللي عايز الإصلاح بتاع المزاج والدواق .. وشغل ال3 ورقات .. يروح يدور عليه في بلد تانيه .

⚪️ .. وأقسم لكم بالله لن يكون هناك إصلاح دون القضاء علي هؤلاء المنتفعين .. وهؤلاء الذين يمسكون بأبواق التهديد والترهيب والتخويف والسب والشتم ونشر الأكاذيب لصالح رواتبهم الشهرية .

🟣.. ومن أهم أسباب تطبيق بند ال8 سنوات في حال تم تطبيقه بأثر رجعي .. أو بتاريخ صدور القرار .. أو حسب ما يقره مجلس النواب .. وبعد إعتماده من الرئيس .. هؤلاء المرتزقه .. بتوع “أبجني تجدني” !!

🔴 .. وحتي يستوفي هذا الأمر كل مراحل قانونيته .. بلاش نألف حكايات وروايات كذابه .. ونعملها خناقة موجهه ضد أشخاص .. وكل واحد يلم ” حماااااااره “..
أو يربط “جاموسته ” قدام غيطه .. ولما بلدك تقول حاجه .. كله لازم يقول سمعاً وطاعه .
كفايه بقي .. خربتوها وصدقناها “إتبنت” .. وكان حلمنا الثورة تأتي للرياضة .. والحمد لله وصلت بقوة بعد أولمبياد باريس .. وخطة الإنقاذ يتابعها بكل حسم وتصميم وعزيمه الرئيس عبدالفتاح السيسي شخصياً .

🔵 .. وهذا يجعلنا كلنا متفائلين .. واللي يعمله الرئيس إحنا معاه .. حتي لو ألغي كل التعديلات .. فثقتي في الرئيس ليس لها حدود .. وبلا سقف .. أو مصالح سوي بلدي وولدي والأجيال القادمه .. !!